CILFACH - DYDDIAD RHYDDHAU HYDREF 6ed 2008

Canwr ifanc yn Adennill lle’r Piano
Ar y 6ed o Hydref bydd Recordiau Aran yn rhyddhau yr EP gyntaf gan y Canwr a’r Cyfansoddwr - Ynyr Llwyd. Teitl y CD ydy ‘Cilfach’ ac mae’r chwech o ganeuon sydd arni yn dangos ei fedr i gyfansoddi wrth y piano mewn arddull wreiddiol a chyfoes.
“Mae cymaint o fandiau ifanc sydd yn defnyddio gitâr, bas, a drymiau,” meddai Ynyr, ”ond dim cymaint o bianyddion cyfoes sydd yn cyfansoddi caneuon gyda band. Mewn ffordd, dwi’n ceisio codi ymwybyddiaeth yr offeryn, a’i ymestyn tu hwnt i arddulliau clasurol yn unig, sef beth y cysylltir y piano ag ef gan amlaf.”
Ond dychwelyd at y piano mae Ynyr oherwydd fe’i hadnabyddir hyd yn hyn fel gitarydd yn y grŵp ‘Labrinth’.
“Rwyf wedi bod yn cyfansoddi caneuon ers oeddwn i’n ddim o beth, ar biano a gitâr, ond y piano yw’r offeryn agosaf at fy nghalon”.
Roedd ei frawd Rhys yn gyd-aelod o’r band a’i fam yw’r gantores werin a cherdd dant adnabyddus, Leah Owen.
”Rydym yn sicr yn deulu cerddorol ac mae hynny wedi cael dylanwad mawr ar fy mywyd”.
Y mae Ynyr yn cychwyn yn fuan ar ei flwyddyn olaf ym Mhrifysgol Bangor, lle mae’n astudio Cerddoriaeth. Fel rhan o’i astudiaethau bu’n cyfansoddi caneuon i’r grŵp lleisiol ifanc – Enfys. Clywir dwy o aelodau’r grŵp hwnnw ar yr EP, sef Jade Louise Davies a Mared Thomas. Cynhyrchwyd yr EP gan Wyn Pearson sy’n gitarydd sesiwn proffesiynol, yn gyn-enillydd ‘Tlws y Cerddor’ ac yn ffrind personol i’r teulu. Yr offerynwyr eraill yw Matty Roberts ac Emyr Rhys ar ddrymiau a bâs.
Gobaith Ynyr, wedi iddo gwblhau ei astudiaethau, yw llunio gyrfa i’ddo’i hun yn gwneud gwaith tebyg i hyn.
“Rwy’n teimlo fod lle gwag a chyfle i’r math hwn o gerddoriaeth yn y sîn roc Gymraeg ar hyn o bryd,” meddai.
A pha gerddorion sydd wedi dylanwadau arno fwyaf?
“Ar ôl i mi ddechrau ymddiddori mewn canu a chyfeilio i mi fy hun, rwyf wedi dod i hoffi artistiaid fel Huw Chiswell ac Elton John”. 
Er mwyn clywed un o’r traciau oddi ar yr EP, gallwch wylio fideo o Ynyr yn perfformio trwy fynd i www.youtube.co.uk a theipio enw’r gân ‘Calon ar Glo’.